ಮಲೆನಾಡಿನ ಕಂಪು

ಮಲೆನಾಡಿನ ಮಾನ್ಸೂನ್ ಮಳೆಯ ಅರ್ಭಟದ ಭೀಕರತೆ ಅದನ್ನು ಅನುಭವಿಸಿದವರಿಗಷ್ಟೇ ಗೊತ್ತು.
ಸುತ್ತಲೂ ಕರಿಯ ಕಗ್ಗತ್ತಲ ಕಾಡು. ಕಪ್ಪಾದ ಮೋಡ ಆಗಸವನ್ನು ಆಕ್ರಮಿಸಿದರೆ ಸೂರ್ಯನನ್ನು ತಿರುಗಿ ಕಾಣಲು ೩ ರಿಂದ ೪ ತಿಂಗಳೇ ಕಾಯಬೇಕು. ಮಳೆಯ ಆರ್ಭಟಕ್ಕೆ ಮೇಲ್ಮಣ್ಣನ್ನೆಲ್ಲಾ ಕೊಚ್ಚಿಕೊಂಡು ಕೆಂಪಾಗಿ ರಭಸದಿಂದ ಹರಿಯುವ ಸಣ್ಣಪುಟ್ಟ ತೊರೆಗಳು. ಅಲ್ಲಲ್ಲಿ ಮತ್ತಿಮರ,ಕೌಲುಮರಗಳ ಮೇಲೆ ಬೆಳೆಯುತ್ತಿರುವ ಮರಕೆಸು. ಮಳೆಗಾಲದ್ದೇ ಆದ ಹೂಗಳಿಂದ ತುಂಬಿರುವ ಎಲ್ಲರ ಮನೆಯ ಹೂದೋಟಗಳು...
ಸರಿಯಾದ ಕಾಲುವೆಗಳಿಲ್ಲದೇ ರಸ್ತೆಯಲ್ಲಿಯೇ ನೀರು ಹರಿಹರಿದು ಕೊರಕಲು-ಮುರುಕಲು ರಸ್ತೆಗಳು.ರಸ್ತೆಯ ಮಣ್ಣು ನೀರಿಂದ ಬರುವ ಜಂಗನ್ನು ತಡೆಯಲು ಎಲ್ಲರ ವಾಹನಗಳ ಚಕ್ರಕ್ಕೆ ಬಡಿದ ಹಳದಿ ಪೇಂಟು. ಇನ್ನು ಕೆಲಸದವರಂತೂ ಕಂಬಳಿಯ ಕೊಪ್ಪೆಯನ್ನು ಮಾಡಿಕೊಂಡು ಅದನ್ನು ಬೆನ್ನಿಗೆ ಹೊದ್ದು ಗದ್ದೆಯ ಕೆಲಸಕ್ಕೆ ಹೊರಡುತ್ತಾರೆ.
ತೋಟಗಳಲ್ಲಿ ಮಳೆಗಾಲದಲ್ಲಿ ಮಾತ್ರ ಬದುಕುವ ಉಂಬಳಗಳ ಕಾಟ. ಮನೆಯ ಅಂಗಳವಂತೂ ಕುರ್ಲಿ, ಚ್ವಾರಟೆ ಹುಳ, ನಂಜುಳೆ (ಎರೆಹುಳು) ಗಳ ಸಾಮ್ರಾಜ್ಯ.. ಪರ್ಸು ಮತ್ತು ಅವನ ಕಡೆಯವರು ಕುರ್ಲಿಯ ಚಟ್ನಿ ಮತ್ತು ಸಾರು ಬಹಳ ರುಚಿ ಇರುತ್ತದೆ ಎಂದು ಹೇಳುತ್ತಾರೆ..!!!
ಗದ್ದೆಯನ್ನು ಉಳಲು ವರ್ಷದಂತೆ ಜೋರು ತಯಾರಿ. ಹಾಳಾಗಿರುವ ಟ್ರ್ಯಾಕ್ಟರ್ ನ ರಿಪೇರಿ, ಉತ್ತ ಗದ್ದೆಯ ನೆಲವನ್ನು ಸಮಾನಾಂತರ ಮಾಡಲು ಬಳಸುವ ಎತ್ತುಗಳಿಗೆ ಭರ್ಜರಿ ಊಟ. ಭತ್ತವನ್ನು ಬಿತ್ತಲು ಬಳಸುವ ಒಳ್ಳೇ ಜಾತಿಯ ಭತ್ತದ ಬೀಜದ ಹುಡುಕಾಟ.

more to follow in coming days....